election pride of 2025

जेनजी आन्दोलन पृष्ठभूमि रहेको यो निर्वाचन सुरक्षा र नतिजा दुवै दृष्टिकोणबाट विशेष रहन गयो। कतै बुथ कब्जा भएन। कतै रक्तपात भएन। देशभर एकै चरणमा शान्तिपूर्ण तरिकाले निर्वाचन सम्पन्न भयो।

मतदाताहरूले यो निर्वाचनमा आफ्नो मत बदलेर विद्यमान शासकीय स्वरूपभित्रै एउटै पार्टीलाई दुई तिहाइ बहुमतको आश्चर्यजनक नतिजा दिएका छन् । पछिल्ला निर्वाचनहरूको तुलनामा दल र उमेरमा यो निर्वाचनको नतिजा बिल्कुलै भिन्न देखिन्छ। यससँगै यो निर्वाचनले अबको संसदीय राजनीतिमा समेत नयाँ समीकरण दिएको छ। भलै लैङ्गिक र समावेशिताको हकमा नतिजा करिब पछिल्ला निर्वाचनहरूसँग समान रहे।

केही वर्षअघि मात्र गठन भएको राष्ट्रिय स्वतन्त्र पार्टी (रास्वपा) र हालै खोलिएको श्रम संस्कृति पार्टी (श्रसपा) ले यो निर्वाचनमा निकै राम्रो गरे। अर्कोतिर पुराना दलहरू नेपाली कांग्रेस, एमाले, नेकपाजस्ता कम्युनिस्ट पार्टीहरू खुम्चिए। राजतन्त्रको वकालत गर्ने राष्ट्रिय प्रजातन्त्र पार्टी (राप्रपा) लाई जनताले पत्याएनन्। तराईवादी दलहरूको त ढोका नै बन्द भयो।